半月灣一日游 @ Lam cat的部落格

哇! 終於都打完我5月24日嗰日嘅開心旅程, 由於有個傻婆話我經常唔UPDATE, 我依家終於完成LA, 咁多字, 對呢個有長篇大論恐懼症嘅你好咪好驚呢? 哈...哈...哈.... 你唔會有心機睇得晒嫁.... 話說回來, 其實係因為我通常只會喺LUNCH時間先打, 所以至咁耐先完成, 真係好對唔住啦!! 不過嗰日真係好開心呢, 可惜AR Q話唔會再陪我去沙灘了.... 不過仍然很感謝神賜給我這些和我周圍去的好朋友呢!!

好開心呀! 24號那天同Ar Q & Casio 去西貢嘅半月灣. 其實我哋一個禮拜前已經plan定去游水, 點知天有不測風雲, 去之前幾日落大雨, 天文台仲話會持續到禮拜尾. 不過我從來對天文台都抱懷疑態度, 但唔多唔少都有些少唔開心. 我已經喺祈禱簿度叫CK幫我代求, 希望神會答應我依個任性嘅要求啦! 24號嘅前日, Casio 同 Ar Q 已經叫我要預備PLAN B計劃, 我當然非常之唔情願, 仍然堅持那天有機會會好天的.... 但Casio話要好天嘅機會得15% , 聽到佢咁講我就叫佢快d幫手祈禱. 點知第2日起身, 見個天重係有落雨, 但我覺得天氣已經續漸變好. 嘻嘻.. 不出所料, 下午隱約有太陽出啦!! 我已經預備好心情去海灘lu.. 不過仍然要睇下夜晚嘅天氣先得. 到咗夜晚,我心情非常好, 已經準備好去海灘d嘢. 點知Ar Q 一個電話打嚟, 劈頭第一句就話唔去得~~ 我心諗: Ar Q, 你唔係依個時候先嚟玩嘢嘛!! 但係佢話唔係講笑, 重話隻眼睇唔到嘢, 我當然唔信la, 佢份人成日用誇張法. 不過當佢叫佢個cell員同我講話佢因為踢波時有人搶波, 佢戴嗰副插傷咗隻眼, 出血之如重整爛咗要特別配製嘅400度散光眼鏡. Ar Q 重話我自私, 只故住為天氣祈禱, 無為佢嘅安全祈禱, 重叫我自己同Casio 去添. 唉.. 我心已經沉晒, 於是同Casio商量取消聽日嘅行程, 改做陪Ar Q去配眼鏡. 擾攘咗咁耐, 我同Casio最後終於成功說服佢去西貢度先配好眼鏡後才去半月灣, 佢重叫我整定雞翼添.......

終於到24號啦! 我八點幾起身, 藍天白雲, 根本就係去海灘嘅天氣.

見到咁靚嘅天空, 我就即刻落床準備整雞翼. 點知發覺原來蒜頭用晒, Oh no...要落街買. 我買完返嚟, 都唔夠時間煮, 原本要炆30min, 變到得20min, 炆緊嘅時候已經聞到好大嘅鼓油咮, 我都知道自己重手咗~~我已經盡力諗方法出補救, 可惜為時已晚已. 應該可以當鼓油雞翼食啩?!

我原本約佢哋11:00喺西貢等, 但係架小巴11:00先開, 喺我搭緊小巴嘅途中, Casio突然打俾我話有bad news!!! 我心諗, 唔通Ar Q 又有問題, 莫非佢配唔到眼鏡? 我即刻打俾Ar Q問佢點解唔到. 佢嘅答案係佢連巴士都睇唔到幾號, 上唔到車. 我打俾Casio問點算.. 佢話唯有我哋兩個人去lu! 我當時都諗唔到其他方法, 唯有賴低Ar Q同Casio兩個人游la.. 我當時真係有少少內疚感ga.

落到車,已經見到Casio喺巴士站等緊我, 佢話求其搵間茶餐廳食嘢先去搭船. 行吓行吓...轉角位突然攝出一個人影重拍我膞頭添, 睇清楚先知原來嗰個係Ar Q嚟嘅? 我見到佢當時真係好開心呀, Casio重問我係咪好surpise? 真係好開心呀, 佢哋話因為我遲到, 所以要呃我. Casio已經一早同Ar Q配埋眼鏡tim! 因為我遲到, 所以要請佢哋食lunch la.

好嘢! 終於到要搭船去半月灣, 途中Casio不斷發揮佢天生嘅吹水功, 不時亂嗡附近島嶼嘅歷史等等, 好攪笑

^o^

由於Casio由甫上船一刻已經話就到嘅關係, 終於過咗10分鐘, 船已經埋岸啦! 原來個沙灘唔係好大, 不過d水好清, 都幾乾淨吖! 我哋急不及待去換衫, 喺士多租咗兩個locker, 沙灘席都無張, 兩手空空就去咗游水lu.

可能太耐無去海灘, 覺得d海水真係好鹹, 不過真係好開心, 溫度適中, 重喺海度發現咗好多一條條嘅好似紅樹種子嘅物體. 應該係由好遠嘅地方漂過嚟ga. 我因為自己未試過游出浮台嘅關係, 又唔想兩個男仔要照顧我嘅關係(而且Ar Q唔似可以兼顧到我嘅關係, Casio又游得太快), 所以我就自己喺海邊游lu. 無幾耐佢哋終於返嚟啦! Casio重話喺浮台度發現到d嘢要俾我, 原來就係嗰d周度都有好似紅樹嘅種子.. Casio你好無聊呀, 又想玩我喇!

喺沙灘度Casio見到個細路喺度挖洞堆沙, 佢又話要挖一個成2mx1m深嘅洞. 我哋見casio咁認真, 於是三個大白痴就一齊合力堆沙嘞. 過程真係非常嚴峻, 一邊要防止海水滲入, 又要防止因為挖得太深而倒塌, 周不時又有海水打埋嚟. 而我終於見到Casio認真嘅一面, 佢重話個水堤邊要有d斜坡, 等d海水打埋嚟嘅時候,可以減低衝力, 仲想喺旁邊加條引水道加添. 而Ar Q就負責攤喺海邊出擋住D海水, 真偉大吖! 幾經艱辛,經過幾次失敗都無放棄嘅我哋終於完成呢個創舉啦!!

Casio為咗貫徹佢嘅作品無論喺工程學同美學都要達至高度水平嘅關係, 就游咗出海去拾咗5條紅樹種子返嚟, 去美化呢個咁偉大嘅三峽工程!! 好厲害! 當我哋三個白痴都為咗完成呢個工程而沾沾自喜嘅同時, 我確實見到後面喺度曬太陽嗰班人喺度偷笑我哋嘅所作所為, 哼! 有時我哋推沙推得太耐, 俾太陽曬到好熱嘅時候, 就出海游吓去散熱降溫(我哋去嘅時候正是烈日當空嘅1:00呀!)

當Casio完成咗佢嘅使命無耐, 佢突然間竟然話要清拆?! 重手起刀落, 要向住包圍我嘅城牆用手刀切落去!! 我立刻大喊唔好, 但擋都擋唔切, 已經俾佢切開咗個破口出嚟... 而喺旁邊唔係好做嘢嘅Ar Q竟然重喺度笑, 講什麼"一日建造, 一日拆毀". 你係咪傻ga, 重唔快d幫我手做補救工程? 不過可能Casio見到我咁賣力去補救嘅時候, 佢又發揮天賦又豐富嘅想像力, 話要做一條大老山隧道. 佢就揾咗幾塊合適又較大嘅石頭去做隧道口, 並用紅樹種子去當鋼根作支撐, 然後再喺上面覆蓋厚厚嘅沙 (佢話唔可以俾人睇到呢個工程嘅秘密), 於是乎一條大老山隧道就真係出咗嚟啦! 喺外觀上真係好似呢! 做完呢個工程之後, 我哋又走出去游水lu.. 佢哋再一次游出浮台, 我就自己喺度游, 不過太多人坐浮床,真係好有阻礙! 我真到有個鬼佬抱住一個好細個, 唔知識唔識爬嘅bb喺度俾佢練習游水. 個bb一d都唔驚, 重好開心喺度撥吓手仔同腳仔, 好可愛吖! 我自己游到悶悶地, 又咁耐唔見佢哋返嚟, 就打算沿住d浮波游出去. 不過我最後都打消咗呢個念頭, 我驚萬一有咩事, 就連累到佢哋俾人狂嘔, 同我可能以後都唔使旨意同朋友去沙灘lu.

游吓游吓, 見到有個傻老瞇住眼喺沙灘周圍望, 原來係Ar Q喺度搵我.. 我初頭諗住避開佢嘅視線, 又諗住佢無帶眼鏡應該見我唔到, 但估唔到佢竟然揾到我, 重話揾咗我好耐tim! 我都唔知佢哋原來已經返埋岸. 未上到岸, 已經見到有個傻佬攤咗喺度, Casio已經將原先嘅大老山隧道拆咗, 改咗做一個皇座, 用嚟搭住個頭同手, 坐咗喺中間曬太陽添! 佢重叫我哋用D沙堆住佢, 話好舒服, 重問我試唔試. 我不虞有詐拒絕咗, 我覺得以佢性格, 係想玩我嘅. (佢已經試過叫我望吓一個佢搭返嚟嘅玻璃樽, 叫我睇吓裡面有D乜, 然後就潑D水去我塊面度!哼) 我同ar Q就係咁將D沙堆落佢個身同手度. Ar Q仲叫我堆實D同高D, 等Casio唔好出嚟, 我堆緊嘅時候又用d海水淋落佢塊面度, 佢係咁哎唔好呢! 嘻, 仲報唔到仇?! 當Casio 正喺度享受緊我哋為佢整嘅床舖時候, 有個細路女喺後面喊緊. 皇上就問何以會有女子哭聲, 並叫我去察看所為何事?(他是看電視劇"封神榜"看上腦了!

) 當Ar Q叫我疊高D, 唔俾佢起身嘅時候, casio就破洞而出. 然後我哋就開始玩掟沙, 我哋大家喺度互掟, 好似小朋友咁. 佢哋經常圍攻我, 不過我都不甘示弱, 避得到好多次攻擊, 但係都不能幸免全身都係沙嘅遭遇, 好彩我都掟返casio一頭都係沙啫! 有時佢掟完我之後就走入水裡面, 等我整唔到佢, 佢又游得鬼咁快! 激死人! Ar Q又喺度亂咁掟, 做D濕碎又密集嘅攻勢..... 嗰陣時都差不多4:00 LU! 佢哋兩個大白痴重喺度玩俾海水沖上岸嘅遊戲, 重扮遇到海難嘅人喺度大嗌"HELP", 真係笑死我..兩個白痴仔.....

我同ar Q都曬到黑咗同紅咗, 但阿Casio竟然一d都無反應, 重係白雪雪的 (呀, casio個手臂底同個肋旁有三粒圓點狀嘅紅色汗斑, 佢話係聖痕嚟ga, 好白痴!) 我哋見casio一d都冇黑到, 同埋見到佢d聖痕, 就攞起d沙同佢做marsage, 希望可以捽走佢, 同埋捽紅佢個身, 等佢易曬d, 雖然佢喺度哎好痛, 但我哋為咗佢好, 都大大力的幫佢繼續捽! 見佢冇反抗, 可能都幾舒服.

整整吓都差唔多時間要去碼頭釣魚, 我哋就拿拿臨去沖身同換衫, 不過因為我哋之前掟沙掟得太興起, 頭上面D沙都沖唔走, 要返到屋企先沖得淨. 之後佢哋就去食我整嘅雞翼. 一攞出嚟, D色都已經變咗LA, 又唔熱, 我心諗唔知重食唔食得tim? 當我正在擔心會唔會太鹹嘅時候, 佢哋竟然話只有雞翼味?? 吓, 莫非我用d可樂沖得太淡?! 不過我諗最大可能係唔入味, 炆得唔夠耐, 真係好對唔住各位期待食我d雞翼嘅你哋! 不過我就唔係好想食, 因為出門口嘅時候已經食咗3隻la! 不過見到佢哋都仍然食咗好多, 我真係好感動!!!

最後我都食咗2隻!

終於去到碼頭預備釣魚lu, Q買咗D魚牌同紅蟲, 佢重教我哋穿魚勾tim... 開始無幾耐, 喺我身旁嘅casio發現近石位置有隻蟹, 佢喺度引隻蟹上釣, 不過礙於技術問題, 佢始終都釣唔到隻蟹上嚟. 算啦, 唯有我出手啦! 講都唔信, 唔使1分鐘就釣咗隻蟹上嚟, 仲要條紅蟲依然健在, 著實無難度..哈哈哈... 身旁嘅casio依然未有斬獲, 我見到佢咁樣真係無能為力... 我隻蟹亦因為無盒載嘅關係, 要放返佢出大海了! 那邊箱, Ar Q已經無聲無色咁釣咗條魚毛上嚟LU (P.S.並無任何踩人成份, 我們所買的魚勾是釣魚毛的!!) 諗諗吓其實都幾無聊, 釣完上嚟相都無影就丟返落海... 我就經常以為有魚上釣, 但係原來係D好細嘅魚仔係咁"端", 喺度餵魚...不過都有釣到一條魚仔, 但差唔多上到嚟就趺咗落海lu. Ar Q就係咁勾到魚仔, 我話要影相, 佢就將條魚同D紅蟲放埋一齊, 點知條魚因為染咗紅蟲D血, 變到紅咗, 又無水.. 我就覺得佢好可憐, 於是放佢走la! 無幾耐, 我又釣到隻蟹啦! (又係你?) 大小同第一隻差唔多. 都唔知係咪同一隻嚟? 我一釣到上岸, 佢就係咁揾地方走, 我即刻好敏捷咁用隻腳踩住.... 哈..哈...哈... 想逃出我嘅魔掌, 無咁易!! 我踩住隻蟹唔知點算好嘅時候.. ar Q 叫我放腳, 佢話佢捉得住. 佢咁講, 我當然信LA.. 點知一放腳... 隻蟹就咁番返屋企啦

我一次相都無影到呀!!!

釣釣吓, 都差唔多時候要走LA, 如果最尾一班船走咗就要等聽日先返到屋企, 我哋就執埋D嘢喺碼頭度等. 終於要上船離開呢個咁靚又帶俾我咁多歡樂嘅沙灘LA, 依家先有時間攞部手機出嚟影相... 而AR Q竟然話好攰而唔肯同我影...好傷心呀, 咁難得先至可以一齊去海灘

! 不過佢個樣真係好攰呢! 我都有幫佢拍MOVIE, 但好似放唔到上嚟?? 終於返到上岸LA, AR Q話佢下半身好似唔屬於自己.. (咁誇張? 我重要七點幾去油塘同CELL員打羽毛波喎!)

因為重未夠鐘嘅關係, 我哋就去補充吓體力LA. 喺西貢度食D小食同我好鍾意嘅雪糕TIM.. 第一次食豆腐味軟雪糕, 同呍呢拿味差唔多, 不過就無咁香. OK LA. 我哋重去咗一個公園度坐吓, 休息同傾吓計! 不過唔知點解, 平時好容易俾蚊咬嘅我同ar Q竟然無俾蚊咬, 我哋正在覺得好神奇嘅時候, 先發覺原來所有嘅蚊都集結喺CASIO嘅頭頂盤旋, 埸面都幾駭人..

而且D蚊重撥極都唔走TIM... 真係神奇, "烏蠅"就話啫...?? 我哋傾傾吓, 我掛住同CASIO講嘢, 以致Ar Q想講嘢嘅時候, 佢都插唔到咀... 佢重發難話我哋唔尊重佢, 然後就黎手攞起我樽水係咁扑我個頭, 一路鬧我無聽佢講嘢一路扑. 我已經掩住個頭係咁嗌唔好,(我知錯LA, 你使唔使咁呀! >~< ) 但CASIO重衰到喺度係咁笑...(有冇搞錯呀, 又唔係我一個自己衰, 你又唔打CASIO!!哼!) 不過到最後, 我哋都不敵D蚊嘅騷擾(其實受騷擾得CASIO一個..), 決定離開公園去搭小巴走LU, 上到小巴, AR Q簡直好似癱咗咁, 聲又唔多出無里心機喺度休息. 我都廢事同CASIO講咁多嘢嘈住佢. 我都唔係好記得喺邊度一齊落車, 自後就轉地鐵各自走LU...

而我呢, 就要去藍田地鐵站出, 再轉的士去廣田同CELL員打羽毛球, 我去到只剩番15MINS可以打波, 因為已經係8:45PM了, 不過我都有打2場, 一埸拍住老虎仔, 一埸就拍CK, 拍住CK嘅時候基本上唔使走動咁濟,因為佢身形已經殺晒, 夠高嘛. 當中出席嘅成員有小琳, 梓俊, JACKIE, HEDDY, CK, TIGER AND ME. 跟住我哋就去咗平田食飯, 係一間台灣嘢, 食物都OK啦! 不過老虎仔就話唔食, 因為佢話要考數學, 要返屋企溫書. 但最後佢都有食小小嘢, 而我哋亦好認真咁希望可以喺數學嘅題目上幫到佢手.. 我哋都相信"三個臭皮匠, 係可以湊成一個諸葛亮"嘅, 大家你一言我一語去盡量用自己僅存嘅記憶, 去幫助老虎仔解答難題. 當然到最後, 我哋幫到嘅可以話係少到唔係好覺, 但見到大家都出於真心相助, 真的好開心呢. 不過最令我深刻記得嘅係間餐廳嘅買一送一嘅嘢飲真的是差勁!!!! 當我哋發覺大家杯嘢都好似未郁過(除我那杯以外, 雖然好似飲士多啤梨味嘅JELLY水咁

, 但係我都飲晒佢), 大家就開始互試其他人嘅飲品, 睇吓邊個杯嘢難飲D, 就係咁, 我哋就試到人哋收舖都唔肯走. 返到屋企都差唔多12:00了!